Carlo Goldoni
La buona moglie

ATTO PRIMO

SCENA SETTIMA

Precedente

Successivo

Link alle concordanze:  Normali In evidenza

I link alle concordanze si evidenziano comunque al passaggio

SCENA SETTIMA

 

Catte e Momola

 

CAT. Oh che bela mata! Momola, cossa distu de sti spropositi che dise la to parona?

MOM. Mi, siora, no me n’intendo. (adirata)

CAT. Xestu in colera co mi?

MOM. Varè: subito andarghe a dir che m’avè visto al balcon!

CAT. Te n’astu abuo per mal? No ghe dirò più gnente. Fa quel che ti vol; no te dubitar.

MOM. Anca mi, grama puta, me devertisso un puoco. Stemo sempre qua serae.

CAT. Di, Momola, fastu l’amor?

MOM. Oh, mi l’amor! (vergognandosi)

CAT. Via, via, no te vergognar. Senti, se ti gh’ha genio de maridarte, confidete in mi e no te dubitar.

MOM. Me fe vegnir rossa.

CAT. Ah matazza veh, te cognosso. Dime, ghastu gnente de bon da marenda?

MOM. Gh’ho un’ala de polastra, che me xe avanzada giersera.

CAT. Polastra? Caspita! La se stica.

MOM. Sior Pantalon ghe n’ha portà una cota in manega.

CAT. Xela bona?

MOM. Preziosa.

CAT. Cara ti, sentimola.

MOM. Volentiera. Andemo. Disè: me volè maridar?

CAT. Sì, co ti vorà.

MOM. Oh che cara siora Cate. (parte)

CAT. O de ruffe, o de raffe, vogio magnar seguro. (parte)

 

 

 


Precedente

Successivo

Best viewed with any browser at 800x600 or 768x1024 on Tablet PC
IntraText® (VA1) - Some rights reserved by Èulogos SpA - 1996-2009. Content in this page is licensed under a Creative Commons License