Carlo Goldoni
I morbinosi

ATTO PRIMO

SCENA SETTIMA   Arriva un'altra gondola, da dove sbarca Tonina.

Precedente

Successivo

Link alle concordanze:  Normali In evidenza

I link alle concordanze si evidenziano comunque al passaggio

SCENA SETTIMA

 

Arriva un'altra gondola, da dove sbarca Tonina.

 

TON.

Sioria, pute.

BET.

Patrona.

TON.

Saveu dove che sia

La casa dove ancuo se magna in compagnia?

ANZ.

Siora sì. La xe quela; ma no se pol andar.

TON.

Perché?

ANZ.

Perché con lori no i vol done a disnar.

TON.

Ma credeu che drento no ghe ne sia nissuna?

ANZ.

Oh siora no, dasseno, no ghe n'è gnanca una.

TON.

Vardè, no me burlè.

BET.

Gh'ala qualche sospeto?

TON.

Me vorave fermar. Gh'avaressi un liogheto?

BET.

Ala disnà gnancora?

TON.

Mi no.

BET.

Vorla disnar?

Che la vegna da mi; ghe l'anderò a comprar.

Ghe farò una fortaggia. Conzerò la salata;

Gh'ho de la latugheta, tenera, nome nata.

Che la resta servida, la menerò in te l'orto.

Se vorla devertir? No la me fazza torto.

TON.

(Certo sta gran premura, che ha mostrà Giacometo,

De vegnir coi amici, m'ha messo in tun sospeto.

No credo, se no vedo, che done no ghe sia.

Alfin son so muggier, posso aver zelusia). (da sé)

Andémo; son con vu. (a Betta, e parte)

BET.

Che la resta servida.

La servirò pulito, se de mi la se fida.

Pute, cossa diseu? Anca questa xe bona.

Se la vorà magnar, oe, no sarò minchiona.

ANZ.

Eh, la sa far pulito. (a Catte)

CAT.

Chi xe mai sta signora?

ANZ.

Vàtela a cata ti. Mi no lo so gnancora.

CAT.

Che la sia una lustrissima?

ANZ.

Mi no so in verità;

Ma anche de le lustrissime ghe n'è da bon mercà.

CAT.

Ti disi ben, sorela. No le gh'ha pan, gramazze,

E el lustrissimamento el va per le scoazze.

ANZ.

E che spuzza!

CAT.

E che fumo!

ANZ.

Che aria maledeta!

A revéderse, Cate. (parte)

CAT.

Bondi sioria, Anzoleta. (parte)


 

 

 


Precedente

Successivo

Best viewed with any browser at 800x600 or 768x1024 on Tablet PC
IntraText® (VA1) - Some rights reserved by Èulogos SpA - 1996-2009. Content in this page is licensed under a Creative Commons License