II. Otho imperator IIII. Kal. Mai. natus est Camillo Arruntio,
Domitio Ahenobarbo cons. A prima adulescentia prodigus ac procax, adeo ut saepe
flagris obiurgaretur a patre, ferebatur et vagari noctibus solitus atque
invalidum quemque obviorum vel potulentum corripere ac distento sago impositum
in sublime iactare. Post patris deinde mortem libertinam aulicam gratiosam, quo
efficacius coleret, etiam diligere simulavit quamvis anum ac paene decrepitam:
per hanc insinuatus Neroni, facile summum inter amicos locum tenuit congruentia
morum, ut vero quidam tradunt, et consuetudine mutui stupri. Ac tantum potentia
valuit, ut damnatum repetundis consularem virum, ingens praemium pactus, prius
quam plene restitutionem ei impetrasset non dubitaret in senatum ad agendas
gratias introducere.
|