Scaena nona. Puer-Pyrgopolinices

PUER. Ne me moneatis, memini ego officium meum,
ego nam conveniam illum, ubi ubi est gentium;
investigabo, operae non parcam meae.
PYRG. Me quaerit illic. ibo huic puero obviam.
PUER. Ehem, te quaero. salve, vir lepidissime,
cumulate commoditate, praeter ceteros
duo di quem curant. PYRG. Qui duo? PUER. Mars et Venus.
PYRG. Facetum puerum. PUER. Intro te ut eas obsecrat,
te volt, te quaerit, teque exspectans expetit.
amanti fer opem. quid stas? quin intro is? PYRG. Eo.--
PUER. Ipsus illic sese iam impedivit in plagas;
paratae insidiae sunt: in statu stat senex,
ut adoriatur moechum, qui formast ferox,
qui omnis se amare credit, quaeque aspexerit
mulier: eum oderunt qua viri qua mulieres.
nunc in tumultum ibo: intus clamorem audio.--