Disticha XVI-XX

XVI.

Multorum cum facta senex et dicta recenses,
Fac tibi succurrant, iuvenis quae feceris ipse.

XVII.

Ne cures, si quis tacito sermone loquatur;
Conscius ipse sibi de se putat omnia dici.

XVIII.

Cum fueris felix, quae sunt adversa, caveto;
Non eodem cursu respondent ultima primis.

XIX.

Cum dubia et fragilis sit nobis vita tributa,
In morte alterius spem tu tibi ponere noli.

XX.

Exiguum munus cum dat tibi pauper amicus,
Accipito placide, plene laudare memento.