|
10. Caesar, ut per
se consilium caperet quid faciendum videretur, navem conscendit atque omnem
classem se sequi iussit nullis nostris militibus impositis, quod, cum longius
paulo discederet, munitiones nudare nolebat. Cumque ad eum locum accessissent,
qui appellatur Chersonensus, aquandique causa remiges in terram evissent, non
nulli ex eo numero, cum longius a navibus praedatum processissent, ab equitibus
hostium sunt excepti. Ex his cognoverunt Caesarem ipsum in classe venisse nec
ullos milites in navibus habere. Qua re comperta magnam sibi facultatem
fortunam obtulisse bene gerendae rei crediderunt. Itaque navis omnis quas paratas habuerant ad
navigandum propugnatoribus instruxerunt Caesarique redeunti cum classe
occurrerunt. Qui duabus de causis eo die dimicare nolebat, quod et nullos
milites in navibus habebat et post horam X diei res agebatur, nox autem
allatura videbatur maiorem fiduciam illis, qui locorum notitia confidebant;
sibi etiam hortandi suos auxilium defuturum, quod nulla satis idonea esset
hortatio quae neque virtutem posset notare neque inertiam. Quibus de causis
navis quas potuit Caesar ad terram detrahit, quem in locum illos successuros
non existimabat.
11. Erat una navis Rhodia in
dextro Caesaris cornu longe ab reliquis collocata. Hanc conspicati hostes non
tenuerunt sese, magnoque impetu IIII ad eam constratae naves et complures
apertae contenderunt. Cui coactus est Caesar ferre subsidium, ne turpem in
conspectu hostium contumeliam acciperet, quamquam, si quid gravius illis
accidisset, merito casurum iudicabat. Proelium commissum est magna contentione
Rhodiorum; qui cum in omnibus dimicationibus et scientia et virtute
praestitissent, tum maxime illo tempore totum onus sustinere non recusabant, ne
quod suorum culpa detrimentum acceptum videretur. Ita proelium secundissimum
est factum. Capta est una hostium quadriremis, depressa est altera, duae
omnibus epihatis nudatae; magna praeterea multitudo in reliquis navibus
propugnatorum est interfecta. Quod nisi nox proelium diremisset, tota classe
hostium Caesar potitus esset. Hac calamitate perterritis hostibus adverso vento
leniter flante navis onerarias Caesar remulco victricibus suis navibus
Alexandream deducit.
12. Eo detrimento adeo sunt
fracti Alexandrini, cum iam non virtute propugnatorum, sed scientia classiariorum
se victos viderent, +quibus et superioribus locis sublevabantur, ut ex
aedificiis defendi possent+ et materiam cunctam obicerent, quod nostrae classis
oppugnationem etiam ad terram verebantur. Idem, postea quam Ganymedes in
concilio confirmavit sese et eas quae essent amissae restituturum et numerum
adaucturum, magna spe et fiducia veteres reficere navis accuratiusque huic rei
studere atque inservire instituerunt. Ac tametsi amplius CX navibus longis in
portu navalibusque amiserant, non tamen reparandae classis cogitationem
deposuerunt. Videbant enim non auxilia Caesari, non commeatus supportari posse,
si classe ipsi valerent; praeterea nautici homines urbis et regionis maritimae
cotidianoque usu a pueris exercitati ad naturale ac domesticum bonum refugere
cupiebant et quantum parvulis navigiis profecissent sentiebant; itaque omni
studio ad parandam classem incubuerunt.
|