|
37. Haec cum
administraret, numquam tamen intermittebat legatos de pace atque amicitia
mittere ad Domitium, cum hoc ipso crederet facilius eum decipi posse. At contra
spes pacis Domitio in isdem castris morandi attulit causam. Ita Pharnaces,
amissa proximi temporis occasione cum vereretur ne cognoscerentur insidiae,
suos in castra revocavit. Domitius postero die propius Nicopolim accessit
castraque oppido contulit. Quae dum muniunt nostri, Pharnaces aciem instruxit
suo more atque instituto. In fronte enim simplici derecta acie cornua trinis
firmabantur subsidiis; eadem ratione haec media collocabantur acie duobus
dextra sinistraque intervallis simplicibus ordinibus instructis. Perfecit
inceptum castrorum opus Domitius parte copiarum pro vallo constituta.
38. Proxima
nocte Pharnaces interceptis tabellariis, qui de Alexandrinis rebus litteras ad
Domitium ferebant, cognoscit Caesarem magno in periculo versari flagitarique ab
Domitio ut quam primum Caesari subsidia mitteret propiusque ipse Alexandream
per Syriam accederet. Qua cognita re Pharnaces victoriae loco ducebat, si
trahere tempus posset, cum discedendum Domitio celeriter putaret. Itaque ab
oppido, qua facillimum accessum et aequissimum ad dimicandum nostris videbat,
fossas duas derectas non ita magno medio intervallo relicto IIII pedum
altitudinis in eum locum deduxit quo longius constituerat suam non producere
aciem. Inter has fossas aciem semper instruebat, equitatum autem omnem ab
lateribus extra fossam collocabat; qui neque aliter utilis esse poterat et
multum numero anteibat nostrum equitatum.
39. Domitius
autem, cum Caesaris magis periculo quam suo commoveretur neque se tuto
discessurum arbitraretur, si condiciones quas reiecerat rursus appeteret aut
+sine causa+ discederet, ex propinquis castris in aciem exercitum eduxit; XXXVI
legionem in dextro cornu collocavit, Ponticam in sinistro, Deiotari legiones in
mediam aciem contulit, quibus tamen angustissimum intervallum frontis reliquit
reliquis cohortibus in subsidiis collocatis. Sic utrimque acie instructa
processum est ad dimicandum.
|