|
73. Caesar cum ab hoste milia
passuum V castra posuisset videretque eas vallis quibus regia castra munirentur
eodem intervallo sua castra munituras, si modo ea loca hostes priores non
cepissent quae multo erant propiora regis castris, aggerem comportari iubet
intra munitiones. Quo celeriter collato proxima nocte vigilia quarta legionibus
omnibus expeditis impedimentisque in castris relictis prima luce neque
opinantibus hostibus eum ipsum locum cepit, in quo Mithridates secundum
proelium adversus Triarium fecerat. Huc omnem comportatum aggerem ex castris
servitia +agerentur+ iussit, ne quis ab opere miles discederet, cum spatio non
amplius passuum mille intercisa vallis castra hostium divideret ab opere
incepto Caesaris castrorum.
74. Pharnaces, cum id repente
prima luce animadvertisset, copias suas omnis pro castris instruxit. Quas
interposita tanta locorum iniquitate consuetudine magis pervulgata militari
credebat instrui Caesar vel ad opus suum tardandum, quo plures in armis
tenerentur, vel ad ostentationem regiae fiduciae, ne munitione magis quam manu
defendere locum Pharnaces videretur. Itaque deterritus non est quo minus prima
acie pro vallo instructa reliqua pars exercitus opus faceret. At Pharnaces
impulsus sive loci felicitate sive auspiciis et religionibus inductus, quibus
obtemperasse eum postea audiebamus, sive paucitate nostrorum qui in armis erant
comperta, cum more operis cotidiani magnam illam servorum multitudinem quae
aggerem portabat militum esse credidisset, sive etiam fiducia veterani
exercitus sui, quem bis et vicies in acie conflixisse et vicisse legati eius
gloriabantur, simul contemptu exercitus nostri, quem pulsum a se Domitio duce
sciebat, inito consilio dimicandi descendere praerupta valle coepit. Cuius
aliquamdiu Caesar irridebat inanem ostentationem et eo loco militum
coartationem, quem in locum nemo sanus hostis subiturus esset: cum interim
Pharnaces eodem gradu quo in praeruptam descenderat vallem ascendere adversus
arduum collem instructis copiis coepit.
75. Caesar incredibili eius
vel temeritate vel fiducia commotus neque opinans imparatusque oppressus eodem
tempore milites ab opere revocat, arma capere iubet, legiones opponit aciemque
instruit; cuius rei subita trepidatio magnum terrorem attulit nostris. Nondum
ordinibus instructis falcatae regiae quadrigae permixtos milites perturbant;
quae tamen celeriter multitudine telorum opprimuntur. Insequitur has acies
hostium, et clamore sublato confligitur multum adiuvante natura loci, plurimum
deorum immortalium benignitate; qui cum omnibus casibus bellicis intersunt, tum
praecipue eis quibus nihil ratione potuit administrari.
|