-11-

Basia lauta nimis quidam me iungere dicunt,
qualia rugosi non didicere patres.
ergo, ego cum cupidis stringo tua colla lacertis,
lux mea, basiolis immoriorque tuis,
anxius exquiram quid de me quisque loquatur?
ipse quis, aut ubi sim, vix meminisse vacat.
audiit, et risit formosa Neaera, meumque
hinc collum nivea cinxit et inde manu;
basiolumque dedit, quo non lascivius umquam
inseruit Marti Cypria blanda suo;
et, «quid,» ait, «metuis turbae decreta severae?
causa meo tantum competit ista foro.»