Copertina | Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText
S. Alfonso Maria de Liguori
Canzoncine spirituali

IntraText CT - Lettura del testo
Precedente - Successivo

Clicca qui per nascondere i link alle concordanze

- 241 -


Per la Nascita di Gesù.

 

Quanno nascette Ninno a Bettalemme

Era nott', e pareva miezo juorno.

Maje le Stelle - lustre e belle

Se vedetteno accossì:

E a cchiù lucente

Jett'a chiammà li Magge all'Uriente.

 


- 242 -


De pressa se scetajeno l'aucielle

Cantanno de 'na forma tutta nova:

Pe 'nsì agrille - co li strille,

E zombanno a ccà e a llà;

È nato, è nato,

Decevano, lo Dio, che nc'à criato.

 

Co tutto ch'era vierno, Ninno bello,

Nascetteno a migliara rose e sciure.

Pe 'nsì o ffieno sicco e tuosto

Che fuje puosto - sott'a Te,

Se 'nfigliulette,

E de frunnelle e sciure se vestette.

 

A no paese che se chiamma Ngadde,

Sciurettero le bigne e ascette l'uva.

Ninno mio sapuritiello,

Rappusciello - d'uva sì Tu;

Ca tutt'amore

Faje doce a vocca, e po mbriache o core.

 

No nc'erano nemmice pe la terra,

La pecora pasceva co lione;

Co o caprette - se vedette

O liupardo pazzeà;

L'urzo e o vitiello

E co lo lupo 'n pace o pecoriello.

 

Se rrevotaje nsomma tutt'o Munno,

Lu cielo, a terra, o mare, e tutt'i gente.

Chi dormeva - se senteva

Mpiett'o core pazzeà

Pe la priezza;

E se sonnava pace e contentezza.

 

Guardavano le ppecore i Pasturi,

E n'Angelo sbrannente cchiù do sole

Comparette - e le decette:

No ve spaventate no;


- 243 -


Contento e riso

La terra è arreventata Paraviso.

 

A buje è nato ogge a Bettalemme

Du Munno l'aspettato Sarvatore.

Dint'i panni o trovarrite,

Nu potite - maje sgarrà,

Arravugliato,

E dinto a lo Presebio curcato.

 

A meliune l'Angiule calare

Co chiste se mettetten'a cantare:

Gloria a Dio, pace 'n terra,

Nu cchiù guerra - è nato già

Lo Rre d'amore,

Che priezza e pace a ogni core.

 

Sbatteva o core mpietto a ssi Pasture;

E l'uno 'nfaccia all'auto diceva:

Che tardammo? - Priesto, jammo,

Ca mme sento scevolì

Pe lo golio

Che tengo de vedé sso Ninno Dio.

 

Zombanno, comm'a ciereve ferute,

Correttero i Pasture a la Capanna;

trovajeno Maria

Co Giuseppe e a Gioja mia;

E 'n chillo Viso

Provajeno no muorzo i Paraviso.

 

Restajeno ncantate e boccapierte

Pe tanto tiempo senza parola;

Po jettanno - lacremanno

Nu suspiro pe sfocà,

Da dint'o core

Cacciajeno a migliara atte d'amore.

 

Co a scusa de donare li presiente

Se jetteno azzeccanno chiano chiano.


- 244 -


Ninno no li refiutaje,

L'azzettaje - comm'a ddì,

Ca lle mettette

Le Mmane ncapo e li benedicette.

 

Piglianno confedenzia a poco a poco,

Cercajeno licenzia a la Mamma,

Se mangiajeno li Pedille

Coi vasille - mprimmo, e po

Chelle Manelle,

All'urtemo lo Musso e i Mascarielle.

 

Po assieme se mettetteno a sonare

E a canta cu l'Angiule e Maria,

Co na voce - accossì doce,

Che Gesù facette: a aa...

E po chiudette

Chill'uocchie aggraziate e s'addormette.

 

La nonna che cantajeno mme pare

Ch'avette a esse chesta che dico.

Ma nfrattanto - io la canto,

Mmacenateve de stà

Co li Pasture

Vecino a Ninno bello vuje pure.

«Viene suonno da lo Cielo,

Vien'e adduorme sso Nennillo;

Pe pietà, ca è peccerillo,

Viene suonno e non tardà.

 

Gioia bella de sto core,

Vorria suonno arreventare,

Doce, doce pe te fare

Ss'uocchie bell'addormentà.

 

Ma si Tu p'esser'amato

Te si fatto Bammeniello,

Sulo amore è o sonnariello

Che dormire te po fa.


- 245 -


Mentchesto può fa nonna,

Pe Te st'arma è arza e bona.

T'amo, t'a... Uh sta canzona

Già t'ha fatto addobeà!

 

T'amo Dio - Bello mio,

T'amo Gioja, t'amo, t'a...».

 

Cantanno po e sonanno li Pasture

Tornajeno a le mantre nata vota:

Ma che buò ca cchiù arrecietto

Non trovajeno int'a lu pietto:

A o caro Bene

Facevan'ogni poco ò va e biene.

 

Lo nfierno sulamente e i peccature

Ncocciuse comm'a isso e ostinate

Se mettetteno appaura,

Pecchè a scura - vonno stà

Li spurtegliune,

Fujenno da lo sole li briccune.

 

Io pure songo niro peccatore,

Ma non boglio esse cuoccio e ostinato.

Io non boglio cchiù peccare,

Voglio amare - voglio stà

Co Ninno bello

comme nce sta lo voje e l'aseniello.

 

Nennillo mio, Tu si sole d'amore,

Faje luce e scarfe pure o peccatore:

Quanno è tutto - niro e brutto

Comm'a pece, tanno cchiù

Lo tiene mente,

E o faje arreventà bello e sbrannente.

 

Ma Tu mme diciarraje ca chiagniste,

Acciò chiagnesse pure o peccatore.

Aggio tuorto - haje fosse muorto

N'ora primmo de peccà!


- 246 -


Tu m'aje amato,

e io pe paga t'aggio maltrattato!1

 

A buje, uocchie mieje, doje fontane

Avite a fa de lagreme chiagnenno2

Pe llavare - pe scarfare

Li pedilli di Gesù;

Chi sa pracato

Decesse: via, ca t'aggio perdonato.

 

Viato me si aggio sta fortuna!

Che maje pozzo cchiù desiderare?

O Maria - Speranza mia,

Ment'io chiagno, prega Tu:

Penza ca pure

Sì fatta Mamma de li peccature.

 




1 [144.] «E io pe paga t'aggio maletrattato» («Novena del S. Natale», 1823, De Bonis).



2 [146.] Nella notte del S. Natale, invece dell'additato verso, si dice il seguente: «Avit'a fa de lagreme sta notte».






Precedente - Successivo

Copertina | Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText

IntraText® (V89) © 1996-2006 Èulogos