| Table of Contents | Words: Alphabetical - Frequency - Inverse - Length - Statistics | Help | IntraText Library |
| Caius Sallustius Crispus Epistulae ad Caesarem IntraText CT - Text |
|
|
|
| VIII. Haec magna remedia contra divitias
statuo. Nam perinde omnes res laudantur, atque adpetuntur, ut earum rerum usus
est: malitia praemiis excercetur. Ubi ea demseris, nemo omnium gratuito malus
est. Ceterum avaritia bellua fera, immanis, intoleranda est: quo intendit,
oppida, agros fana, atque domos vastat: divina cum humanis permiscet: neque
exercitus, neque moenia obstant, quominus vi sua penetret: fama, pudicitia,
liberis, patria, atque parentibus cunctos mortales spoliat. Verum, si pecuniae
decus ademeris, magna illa vis avaritiae facile bonis moribus vincetur. Atque haec ita sese habere, tametsi omnes aequi, atque iniqui memorent, tamen tibi cum factione nobilitatis haud mediocriter certandum est: cuius si dolum caveris, alia omnia in proclivi erunt. Nam hi, si virtute satis valerent, magis aemuli bonorum, quam invidi essent: quia desidia, et inertia, et stupor eos atque torpedo invasit; strepunt, obtrectant, alienam famam bonam suum dedecus existumant. |
Table of Contents | Words: Alphabetical - Frequency - Inverse - Length - Statistics | Help | IntraText Library |
Best viewed with any browser at 800x600 or 768x1024 on Tablet PC IntraText® (V89) - Some rights reserved by EuloTech SRL - 1996-2007. Content in this page is licensed under a Creative Commons License |