Bænarósk til þeirra sem sjá um kennslu
 22.  Þessar íhuganir gefa oss tilefni til að ávarpa þá sem eru við kennslu og alla þá sem hafa réttindum og skyldum að gegna varðandi sameiginlega velferð samfélagsins.  Vér viljum beina athygli þeirra að því, að nauðsynlegt er að skapa andrúmsloft sem stuðlar að því að fleiri haldi skírlífi í heiðri en það hefur í för með sér að sannarlegt frelsi mun ríkja yfir taumleysi og staðinn verður vörður um þá viðmiðun sem gildir í siðferðislögmálinu.
 Því ber að fordæma opinberlega og einum rómi allt það sem fjölmiðlun í nútíma samfélagi stuðlar að til að vekja upp í mönnum auvirðilegar ástríður og hvetja til lægri siðferðislegs staðals.  Skiptir þá ekki máli hvort í hlut á skrifað orð eða ósiðsamlegt athæfi á sviði eða á hvíta tjaldinu.  Þetta eiga allir þeir að gera sem láta sér annt um að siðmenningin þróist og vilja standa vörð um einstæð gildi mannsandans.  Það er algjör fjarstæða að verja slíka niðurlægingu í nafni listar eða menningar²⁵ eða með því að biðla til frelsis sem opinber yfirvöld hafa leyft á þessu sviði.