Scena Settima. Orsola sul pergolo, e detti

ORSOLA Cossa te fai, fio mio?

Oe, lassé star mio fio,

Che per diana de dia se vegno zo,

Qualcossa su la testa ve darò.

LUCIETTA Via, via, manco sussuro.

ANZOLETTO Sto spuzzetta

No voggio, che el ghe parla co Lucietta.

ZORZETTO Cossa m'importa a mi?

ORSOLA Za per culìa

Sempre se fa baruffa.

LUCIETTA Voleu, che ve la diga, che son stuffa?

ORSOLA No se ghe poi più star in sto campielo

Co sta sorte de zente.

LUCIETTA Oe, oe, come parleu?

ORSOLA Vardè là, che lustrissima! Chi seu?

LUCIETTA Frittolera.

ANZOLETTO Tasé. (a Lucietta)

ORSOLA Sporca.

ANZOLETTO Sangue de diana,

Che debotto debotto... (verso Orsola)

ZORZETTO Cossa voressi far? (contro Anzoletto)

ANZOLETTO Via, sior pissotto. (minacciandolo)

ORSOLA Lassélo star quel puto, e vu patrona

Mio fio no lo vardè.

LUCIETTA Oh, no v'indubitè, che no vel tocco;

Vardè che bel aloco!

Che no ghe sia de meggio in sto paese?

Vardè, che fusto! Che lo lasso a Gnese.