Scena Seconda. Paron Toni e Checca

Paron Toni - Checchina, allegramente.

Checchina - Za so tutto. Sior Pantalon m'ha dito tutto.

Paron Toni - El v'averà dito, che mi no son vostro pare.

Checchina - Sior sì, el me l'ha dito.

Paron Toni - E mi mo ve digo, che vostro pare xe vegnù a Venezia.

Checchina - Oh, gh'ho ben a caro. L'aveu visto? Gh'aveu parlà?

Paron Toni - No l'ho visto, no gh'ho parlà. El m'ha mandà a chiamar; ma no l'ho più trovà. Un mariner m'ha dito che el ghe xe, e adessadesso lo troverò. Son vegnù a darve sta niova per vostra consolazion.

Checchina - In verità, che ancuo posso dir de aver una zornada felice. Prima vederò mio pare, e po presto Beppo me sposerà.

Paron Toni - No so; pol esser de sì, e pol esser de no.

Checchina - Vardè, vedè; no xelo el mio novizzo?

Paron Toni - Finché mi giera in liogo de vostro pare, podeva far de vu quel che me pareva ben fatto; adesso che xe vegnù vostro pare da senno, bisognerà che fe quel che el vorrà elo.

Checchina - E se nol volesse che sposasse Beppo?

Paron Toni - Bisogneria che lo licenziessi.

Checchina - Oh poveretta mi! Credemio che el possa dirme de no?

Paron Toni - Chi sa! Pol esser che el ve voggia maridar con qualche persona de meggio condizion.

Checchina - Sior pare... Sentì, sarè sempre mio pare.

Paron Toni - E mi ve vorrò sempre ben come fia.

Checchina - Sior pare, se me volè ben, feme un servizio.

Paron Toni - Cossa vorressi?

Checchina - Lassè che me sposa con Beppo, avanti che lo sappia quell'altro sior pare.

Paron Toni - Cara fia, no lo vorria desgustar.

Checchina - Co la sarà fatta, nol dirà gnente.

Paron Toni - Ghe penseremo.

Checchina - Caro papà, se me volè ben.

Paron Toni - (La me fa peccà)⁵⁰. (da sé) Via, farò de tutto per consolarve.

Checchina - Se perdo Beppo, no passa tre zorni che me ammalo, e che moro dalla passion. (parte)

Paron Toni - Farò de tutto che no la lo perda. Povera putta, ghe vorrò sempre ben. (parte)