Scena Settima. Anzoletta sartora, e Catte

Anzoletta - Oe, siora Catte, cara vu, insegnème dove che sta de casa siora Checca vostra zermana.

Donna Catte - Vardè, fia; andè zo per calle,¹⁹ passè el ponte, vederè a man zanca²⁰ una corte; la xe la terza porta a man dretta.

Anzoletta - Grazie tanto.

Donna Catte - Cossa andeu a far da Checca?

Anzoletta - Ghe porto una vestina, che gh'ho fatto suso da niovo.

Donna Catte - Lassè véder mo.

Anzoletta - Vardè co bella che la xe.

Donna Catte - Oro? Oro, patrona? Povera sporca! Oro?

Anzoletta - Ve fe maraveggia?

Donna Catte - No voleu che me fazza maraveggia? E quel matto de mio zerman lassa che la fazza?

Anzoletta - La xe so fia, el ghe vol ben.

Donna Catte - Sì ben, so fia!

Anzoletta - Come! No la xe so fia?

Donna Catte - Oe, me prometteu de taser?

Anzoletta - Oh, mi no parlo! Savè che putta che son.

Donna Catte - Checca no xe fia de mio zerman Toni.

Anzoletta - Oh caspita!²¹ De chi xela fia?

Donna Catte - Sentì... ma zitto, vedè.

Anzoletta - Oh, no ve dubitè.

Donna Catte - La xe una mula.

Anzoletta - Oh, cossa che me contè!

Donna Catte - Ve lo confido a vu, che so che sè una putta prudente...