Scena Ottava. Facchino e dette

Donna Catte - Oe, quel zovene, me faressi un servizio coi mi bezzi?

Facchino - Ve lo farò anca senza bezzi.

Donna Catte - Me porteressi sta cesta de drappi?

Facchino - Volentiera.

Donna Catte - Presto, andemo, perché ghe xe un lustrissimo che no se leva de letto, se no ghe porto la camisa da muarse. (parte col Facchino)

Anzoletta - Donca Checca no xe fia de paron Toni? La xe una... sior sì e ste cosse;²² e Beppo la sposa, el me lassa mi per ella? E mi laorerò per una etecettera?²³ No vôi gnanca portarghe più sta vestina; se la la vol, che la la manda a tor; anderò a portar l'andrien alla lustrissima. Una sartora della mia sorte no serve quella sorte de zente. (parte)