Scena Terza. I suddetti, fuor di Canocchia

TOF. (piano a Checca) (Arecordève, siora Checca, che m'avé dito, che de mi no ve degné)

CHE. (a Toffolo) (Andé via, che no ve tèndo).

TOF. (a Checca) (E sì, mare de diana! gh'avéa qualche bona intenzion).

CHE. (come sopra) (De còssa?)

TOF. (come sopra) (Mio sàntolo me vôl metter suso peòta; e co son a traghètto, anca mì me vói maridare).

CHE. (come sopra) (Dasséno?)

TOF. (come sopra) (Ma vu avé dito, che no ve degné).

CHE. (come sopra) (Oh! ho dito de la zucca, no ho miga dito de vù).

LIB. Oe, oe, digo, còssa xé sti parlari?

TOF. Varé! Vardo a laorare.

LIB. Andé via de là, ve digo.

TOF. Còssa ve fàzzio? Tolé; anderò via (si scosta, e va bel bello dall'altra parte).

CHE. (da sé) (Sia malignazo!)

ORS. (a Libera) (Mo via, cara sorèla, se el la volesse, savé che putto che el xé: no ghe la voressi dare?)

LUC. (a Pasqua) (Còssa diséu, cugnà? La se mette suso a bon'ora).

PAS. (a Lucietta) (Se ti savessi. che rabbia. che la me fa!).

LUC. (da sé) (Varé che fusto! Viva cocchietto! La vòggio far desperare).

TOF. Sfadighève a pian, donna Pasqua.

PAS. Oh! no me sfadìgo, no, fio; no vedé che mazzette grosse? El xé merlo da diese soldi.

TOF. E vu, Lucietta?

LUC. Oh! el mio xé da trenta.

TOF. E co belo che el xé!

LUC. Ve piàselo?

TOF. Mo co pulito! Mo cari quei deolìni!

LUC. Vegnì qua; sentève.

TOF. (siede) Oh! qua son più a la bonazza.

CHE. (a Orsetta, facendole osservare Toffolo vicino a Lucietta) (Oe, còssa diséu?)

ORS. (a Checca) (Lassa che i fazza, no te n'impazzare).

TOF. (a Lucietta) (Se starò qua, me bastoneràli?)

LUC. (a Toffolo) (Oh che matto!)

ORS. (a Libera, accennando Lucietta) (Còssa diséu?)

TOF. Donna Pasqua, voléu tabacco?

PAS. Xélo bòn?

TOF. El xé de quelo de Malamocco.

PAS. Dàmene una presa.

TOF. Volentiera.

CHE. (da sé) (Se Titta-Nane lo sa, poverètta ela!)

TOF. E vù, Lucietta, ghe ne voléu?

LUC. (Dé qua, sì ben. Per far despetto a culìa.) (accenna Checca)

TOF. (a Lucietta) (Mo che occhi baroni!)

LUC. (a Toffolo) (Oh giusto! No i xé miga queli de Checca).

TOF. (a Lucietta) (Chi? Checca? Gnanca in mente).

LUC. (a Toffolo accennando Checca con derisione) (Vardé, co bela che la xé!)

TOF. (a Lucietta) (Vera chiòe!)

CHE. (da sé) (Anca sì, che i parla de mì?)

LUC. (a Toffolo) (No la ve piase?)

TOF. (a Lucietta) (Made.)

LUC. (a Toffolo sorridendo) (I ghe dise Puinètta.)

TOF. (a Lucietta, sorridendo e guardando Checca) (Puinètta i ghe dise?)

CHE. (forte verso Toffolo e Lucietta) Oe, digo; no so miga orba, varé. La voléu fenire?

TOF. (forte, imitando quelli che vendono la «puina», cioè la ricotta) Puìna fresca, puìna.

CHE. (s'alza) Cossa xé sto parlare? Cossa xé sto puinare?

ORS. (a Checca, e s'alza) No te n'impazzare.

LTB. (a Orsetta e Checca, alzandosi) Tendi a laorare.

ORS. Che el se varda elo, sior Tòffolo Marmottina.

TOF. Còss'è sto Marmottina?

ORS. Sior sì, credéu che nol sappièmo che i ve dise Tòffolo Marmottina?

LUC. Varé che sesti! Varé che bela prudenzia!

ORS. Eh! via, cara siora Lucietta Panchiana.

LUC. Cossa xé sta Panchiana? Tendé a vù, siora Orsètta Meggiòtto.

LIB No sté a strapazzar mie sorèle, che mare de diana...

PAS. (s'alza) Porté respetto a mia cugnà.

LIB. Eh! tasé, donna Pasqua Fersóra.

PAS. Tasé vù, donna Libera Galozzo.

TOF. Se no fussi donne, sangue de un'anguria...

LIB. Vegnirà el mio paron

CHE. Vegnirà Titta-Nane. Ghe vói contare tutto, ghe vói contare.

LUC. Cóntighe. Còssa m'importa?

ORS. Che el vegna paron Toni Canestro...

LUC. Sì, sì, che el vegna paron Fortunato Baicolo...

ORS. Oh che temporale!

LUC. Oh che sússio!

PAS. Oh che bissabuòva!

ORS. Oh che stramanìo!