SCENA QUARTA

Momola e dette.

MOM. Son qua, siora, son qua.

BETT. Anca sì che ti gieri al balcon?

MOM. Mi al balcon?

CAT. Sì, che t’ho visto mi, co son vegnua (a Momola)

BETT. L’avè vista?

CAT. Seguro.

MOM. Uh che schitona6! (a Catte)

CAT. Senti sa, baronzela, te darò de le sculazae, sa.

MOM. Marmeo, squaquerà.

BETT. Via, via, a monte. Meti a scaldar do pezze, che vogio infassar el putelo.

CAT. Daghelo a ela, che la lo desfazza.

BETT. Sì ben; seu mata?

CAT. Mo perché?

BETT. Una puta volè che lo desfassa? (piano a Catte)

CAT. Oh varè che casi!

BETT. No, no, in casa mia no se fa ste cosse.

CAT. Ben!

BETT. Ben! Anemo, andè a scaldar ste pezze.

MOM. Siora sì, subito. Vorla che lo desfassa mi?

BETT. Siora no: varè che novitae.

MOM. L’ha dito siora Cate. (parte)