SCENA SESTA

Momola e dette.

MOM. Siora padrona, le pezze xe calde.

BETT. Vegno, vegno. Vien qua, vissere mie. (leva il bambino di culla) Vardè, se nol fa vogia? Vardèlo che toco! Tuto el mio Pasqualin. Tuto so pare. Tiò, siestu benedio. (lo bacia)

CAT. Via, che ti l’ha basà che basta.

BETT. Ti no ti sa cossa che sia amor de fioi; perché no ti ghe n’ha mai abuo. Oh che amor che xe quelo de mare!

CAT. Cara ti, dime una cossa. A chi ghe vustu più ben? A to mario, o a to fio?

BETT. A tuti do.

CAT. Ma a chi ghe ne vustu più?

BETT. No so.

CAT. Se ti avessi da perder uno de lori, chi perderessistu più volentiera?

BETT. Senti, sorela, dei fioi come questo ghe ne poderia aver dei altri, ma dei marii come Pasqualin no ghe ne troverave mai più. (parte)