SCENA VENTUNESIMA

Bettina sola.

BETT. Che i diga quel che i vol, no m’importa. Pasqualin se stuferà de far la vita ch’el fa; el tornerà a far giudizio; el se pentirà de tuto quel ch’el m’ha fato, e alora, pensando al ben che gh’ho volesto, a la fede che gh’ho conservà, el me chiaperà sempre più a ben voler, e el me darà tante consolazion, quanti baticuori ch’el m’ha fato provar. Remeto la mia causa al cielo, a quelo racomando el mio Pasqualin, racomando el mio povero putelo, fruto inocente del nostro amor. El cielo remedierà, el cielo provederà. Chi se confida in tel cielo, no pol perir. (parte)