SCENA VENTICINQUESIMA

Bettina e Pantalone

PANT. Dove andeu, niora?

BETT. Mi vago a casa, sior missier.

PANT. Aveu visto vostro mario?

BETT. Sior sì.

PANT. Cossa diselo?

BETT. Adessadesso el vegnirà a casa anca elo.

PANT. No credo gnente. V’alo dito la baronada ch’el m’ha fato?

BETT. Oh, ch’el xe tanto pentio!

PANT. I soliti pentimenti.

BETT. L’ha infina pianto.

PANT. Anca co mi l’ha pianto, e po l’ha fato pezo.

BETT. Sta volta el dise dasseno.

PANT. No no, no ghe credo più. Niora, andè a tior el putelo, e vegnì a casa mia.

BETT. Senza de Pasqualin?

PANT. Lassè ch’el vaga quel desgrazià.

BETT. Oh mi no, sior missier, senza de lu no vegno.

PANT. E dove xe i vostri manini? (osservandole le braccia)

BETT. I manini? I ho lassai a casa.

PANT. A casa i avè lassai? Dove i aveu messi?

BETT. In cassa.

PANT. In cassa? Deme mo la chiave de la cassa.

BETT. Oh, la me compatissa. La chiave de la mia cassa no la dago a nissun.

PANT. No ve fidè de mi? Cossa gh’aveu paura?

BETT. Gh’ho de la roba in cassa, che no vôi che nissun la veda.

PANT. Gh’aveu contrabandi?

BETT. Nualtre donne gh’avemo de le tatare che i omeni no le ha da veder.

PANT. E mi gh’ho paura che i manini sia andai.

BETT. Come andai?

PANT. Che ve li abia magnai vostro mario.

BETT. Oh giusto, mio mario gnanca per insonio.

PANT. Zurèlo mo?

BETT. Cossa vorlo che zura? Mi ghe digo la verità.

PANT. Ho capio tanto che basta. Tegnì da lu. Sè do mati insieme. Fe quel che volè, no ghe penso gnente. Fe conto che sia morto. Andeve a far benedir. (parte)