SCENA SETTIMA

Bettina, poi Catte

BETT. Mo che femena che xe quela mia sorela! Purché la magna e che la beva, no la ghe pensa altro. Mi ogni puoco de travagio, me desconisso. Fegurarse come che sta el mio cuor senza de le mie vissere, senza del mio Pasqualin, no gh’ho vogia de gnente. Deboto no me recordo più gnanca del mio putelo. Son più morta che viva.

CAT. Oh sorela, vustu rider?

BETT. Oh, ghe vol assae a farme rider.

CAT. Sastu chi xe?

BETT. Via mo, chi?

CAT. La lustrissima siora marchesa, sola co fa una mata.

BETT. Gh’aveu tirà?

CAT. Mi sì.

BETT. Cossa vorla da mi?

CAT. Indevinela ti grilo.

BETT. Che la vegna pur, sentiremo.

CAT. Oe, se la fa la mata, per diana che la scufia va in tochi.