IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
LUCIETTA Vegnì anca vu, vegnì a zogar; voleu?
ORSOLA Perché no?
DONNA PASQUA Semo qua in compagnia.
DONNA PASQUA Via, salùdela. (a Gnese)
ORSOLA Bondì, Gnese. Cossa gh'àla? (piano a donna Pasqua)
DONNA PASQUA La xè contenta; ma no la se ossa.
LUCIETTA (Oe siora mare, cossa gh'è de niovo
In tra Gnese, e Zorzetto?). (a donna Catte)
DONNA CATTE (Credo, che i sia novizzi).
LUCIETTA (Vara, che stropoletto!).
LUCIETTA Mettè suso; (mette il soldo nella sémola)
ORSOLA Questi qua xè do soldi. Anca per ti.
DONNA PASQUA Gnese, imprèsteme un soldo.
No la gh'ha mai un bezzo. Via, tolè.
DONNA CATTE Metterò, aspetta. (tira fuori uno straccio)
ZORZETTO La gh'ha i bezzi zolai co la pezzetta!
DONNA CATTE Fazzo per no li perder. Tolè el soldo.
LUCIETTA Zoghemo, e no criemo.
LUCIETTA Presto, missiemo. (mescola ma sémola)
ZORZETTO Voggio darghe anca mi una missiadina.
LUCIETTA E missieremo fina domattina.
GNESE Via basta, femo i mucchi. (mette le mani nella sémola)
LUCIETTA I mucchi i vòi far mi. (fa alcuni mucchi colla sémola)
ORSOLA Eh, che no savè far. Se fa cusì.
LUCIETTA Oh, siora no, no voggio,
Che m'insporché la sémola de oggio.
ORSOLA Gh'ho le man nete più de vu patrona.
DONNA PASQUA Zitto. Li farò mi.
ORSOLA La più vecchia, sì ben.
Mi la più vecchia? tocca a donna Catte.
DONNA CATTE Vecchia cottecchia!
ORSOLA A monte, a monte; fali ti, fio mio. (a Zorzetto)
ZORZETTO Ve contenteu? (poi va facendo i monti)
LUCIETTA Questo mi.
DONNA CATTE Via, femo i patti.
GNESE Ben, ben, mi sarò l'ultima.
LUCIETTA No gh'è gran diferenza tra de nu.
DONNA PASQUA Donna Catte, a zernir ve tocca a vu.
DONNA CATTE Oh, ve cedo, sorela.
DONNA CATTE Ve cedo de dies'ani, e più.
DONNA PASQUA Povera vecchia fiappa.
LUCIETTA Via, via, femo cusì: chi chiappa, chiappa. (ognuna prende il suo monte, e vi cerca dentro il soldo)
DONNA CATTE Oe mi no trovo gnente.
LUCIETTA Quatro da vostra posta?
Sì, sì, sior Zorzi, l'avè fato a posta.
GNESE Se volè i quatro soldi, mi ve i dago.
LUCIETTA, DONNA CATTE Siora sì, siora sì.
DONNA PASQUA, ORSOLA, ZORZETTO Siora no, siora no.