SCENA SECONDA

Brighella, poi Arlecchino

BRIGH. Basta, ch'el se reffa quanto ch'el vuol, che per mi no ghe credo più. No digo de no ziogar, perché el ziogar assae è da matti, e no ziogar gnente è da allocchi: ma cabale no ghe ne voggio più certo. Orsù, bisogna parecchiar el bisogno per st'Accademia. Oe, Arlecchin, Arlecchin digo, dov'estu?

ARL. Etu ti che me chiama?

BRIGH. Sì, son mi.

ARL. Ti è un bel aseno.

BRIGH. Perché son un asino?

ARL. Perché quando i galantomeni magna, no i se descomoda.

BRIGH. A st'ora ti magni?

ARL. Mi no so de ore. Me regolo col reloio del appetito.

BRIGH. Orsù, bisogna dar una man portar i taolini, le careghe; far quel che bisogna.

ARL. Mi, con to bona grazia, no vôi far gnente.

BRIGH. Perché no vustu far gnente?

ARL. Perché no ghe n'ho voia.

BRIGH. Eh, te la farò vegnir mi la voia. Anemo, digo, presto a laorar.

ARL. Brighella, abbi giudizio; no me perder el respetto.

BRIGH. La perdona, zentilomo, un'altra volta farò el mio dover. Trui, va là25.

ARL. A mi trui, va là? A mi? Sangue de mi. (mette mano al suo legno)

BRIGH. Olà, olà, le man a casa, che te pesto co fa el baccalà. (s'attaccano)