FILIB.

Cussì sarè contenta!

CAT.

Sì, sì, ma tremo ancora dalla rabbia.

No me posso quietar, se no me vendico

Con quella temeraria.

FILIB.

El più bel modo

Per vendicarse è questo.

Quando la saverà che vu sè sposa,

Creperà dal velen quella invidiosa.

CAT.

Corro donca a mostrarghe la scrittura.

FILIB.

No, no, fermeve un poco,

No xe gnancora tempo, e vu no sè

Gnancora mia muggier.

CAT.

Perché?

FILIB.

Ghe manca

Una solennità necessarissima,

Che ve sarà ben nota.

CAT.

Cossa ghe manca mai?

FILIB.

Manca la dota.

CAT.

Eh za, la se gh’intende.

FILIB.

Altr’è che la s’intenda,

Altr’è che la ghe sia.

Questa, colonna mia,

Xe la prima fonzion che far dovemo;

Per el resto tra nu se giusteremo.

CAT.

Mo via, trovè el nodaro

Che ha da far el contratto;

Menémolo in t’un tratto

A casa de mia mare.

Alla presenza de do testimoni

Ella ve darà i bezzi; za savè,

L’è una donna suttila come l’oggio,

Sempre la gh’à paura che i la bara.

FILIB.

(Quand’ho preso i denar, vado a Ferrara).

Ben, ben, la gh’à rason;

Vago a tor el nodaro e adesso vegno.

(Io cercherò un nodar di bell’ingegno).

Aspettème pur qua.

CAT.

Mi no me parto,

Se stessi fin sta notte.

FILIB.

(Faccio in un giorno sol due belle botte). (parte)