Dopo tanto aspettar, son arrivada

A trovar un mario,

Onorato, dabben, e da par mio.

Certo al tempo d’adesso

Più no se sa de chi fidarse; tutti,

Tutti i gh’à qualche vizio,

O el ziogo, o l’osteria, o quel servizio.

Quando una putta gh’à un poco de dota,

Tutti vorria sposarla

Coll’idea de magnarla.

Ma mi so el fatto mio, no gh’ò paura

Che i me trappola certo, e benché sia

Putta de primo pelo,

Son accorta anca mi la parte mia.

Mi no credo alle mignognole

De ste mandrie gazzarae;

I vien via co ste bulae:

«Son un uomo de proposito,

In andrien ve manderò»;

Ma no gh’abbado,

Perché mi so

Dove el diavolo tien la coa.

Ho trovà...

Ma me par

Che quella sia la vedua;

Sì ben, l’è giusto ella; voggio andar...

No, perché aspetto Toni.

Resterò; con giudizio

Procurarò schivar ogni contrasto,

Ma se la prima la sarà a taccarme,

Anca mi certo saverò refarme.