SCENA QUINTA

Siora Tonina in finestra.

TON. Oe! sior Boldo xe andà da siora Lugrezia. Se siora Giulia lo savesse, poverazza, la se despereria: manco mal che no la l’ha visto. Gh’ho gusto che no la lo sappia; e sì ancuo l’ha da vegnir da mi; se podeva dar benissimo che la lo vedesse. Oh che cara siora Lugrezia! Adesso l’ho scoverta come che va. Manco mal che mio mario no ghe anderà più; el me l’ha promesso.