IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Siora Giulia, siora Chiaretta e detta.
CHIAR. Oh patrona, siora Tonina.
CHIAR. Oh cara sta vecchietta!
TON. Via, la se cava zoso, la fazza conto d’esser in casa soa.
GIU. Grazie, siora Tonina. (si smaschera)
CHIAR. Passa assae mascare ancuo? (a Tonina, smascherandosi)
TON. No so da senno. Me son buttada un pochetto al balcon, ho visto una certa cossa che no m’ha piasso, e son vegnua subito drento.
GIU. Ah, l’ha visto tutto donca?
TON. M’ho imbattù giusto in quello.
GIU. Ah povere muggier! (ciascheduna per equivoco intende del marito dell’altra)
TON. Oh cara siora Giulia, bisogna aver pazienza.
GIU. Sti marii tali e quali bisognerave darghene tante, fin che i bulega99.
TON. Sì ben, proveve. Ogni men de che100, i manazza de dar.
CHIAR. Mo via, se le se perde in chiaccole, no vederemo le mascare.
TON. Xe ancora a bonora. Le se senta un pochetto, le sarà stracche.
GIU. Se no la vol altro, son anca un pochetto stracchetta. No son usa troppo a camminar, e me stracco de gnente.
GIU. No la se incomoda. Grazie. (siede)
TON. Anca ela, siora Chiaretta.
CHIAR. Mi, se la se contenta, anderò un pochetto al balcon.
TON. Patrona, per mi la se comoda.
CHIAR. Vorla, siora santola, che vaga un pochetto al balcon?
GIU. Andè pur, fia; ma vardè ben, vedè, se le mascare ve dise qualcossa, tireve drento.
CHIAR. Siora sì, siora sì. (Oh, se passasse Baseggio, no me tirerave miga drento). (da sé, parte)