SCENA VENTESIMA

Siora Giulia dalla camera, e dette.

GIU. Come parleu, siora? A mi pettegola?

LUG. Siora sì, l’ho dito e ve lo mantegno. Sè andada digando che vostro mario vien da mi, che el fa, che el briga; credeu che no lo sappia?

GIU. Oe, lo negheressi fursi, che mio mario no vegna in casa vostra?

LUG. Chi ve nega sta cossa? Varè128 che suggizion che gh’ho a dirve de sì.

GIU. Sè una bella petulante, siora.

LUG. Sè una bella temeraria, patrona.

GIU. A mi!

TON. Oe, siora, voleu aver creanza? (a Lugrezia)

LUG. Oh fia mia, son nassua de carneval, no gh’ho paura de brutti musi.

GIU. Cossa vienlo a far mio mario in casa vostra?

LUG. Cossa crederessi che el vegnisse a far? Nol xe né bello, né ricco; no sarò così inspiritada129 de tenderghe per sior sì e ste cosse130.

GIU. Eh za, el solito. Co s’ha magnà, se sprezza.

LUG. Coss’è sto magnà? Coss’oggio magnà? Mi no gh’ho bisogno dei vostri peocchi. Se sior Boldo xe vegnù da mi, el xe vegnù per i numeri del lotto.

GIU. Oh, oh, oh, sentì, sentì, siora Tonina, per i numeri del lotto.

TON. E a mio mario la s’inventa che la gh’ha imprestà dei bezzi.

LUG. E cussì, cossa vorressi dir?

GIU. Via, che sè una busiara.

TON. Via, che sè una panchiana131.

LUG. Oh cospetto de diana de dia...

GIU. Oe, sentì come che la cospettiza132!

LUG. Sia maledetto...

TON. Oe, la biastema.

LUG. Se savessi come che me pizza133 le man!

GIU. Provève, siora.

TON. Provève.

LUG. Credeu de farme paura, perché se in do? No v’ho gnanca in te la mente, se fussi diese de la vostra sorte.