SCENA NONA

Camera in casa del Dottore, con tavolino e sedie.

Tonino solo a sedere, poi Brighella

TON. Xe un’ora che stago qua a far anticamera, e sta patrona no la se vede. No vorave che i m’avesse tolto per gonzo, e che i me volesse tegnir in reputazion la marcanzia, per farmela pagar cara. A Tonin no i ghe la ficca. Son venezian, son cortesan, e tanto basta. Anemo, o drento, o fora. Oe, gh’è nissun in casa?

BRIGH. Son qua a servirla. Cossa comandela?

TON. Chi seu vu, sior?

BRIGH. Son servitor de casa.

TON. (Cancarazzo! Livrea?) (da sé) Diseme, amigo, la vostra patrona fala grazia, o vaghio via?

BRIGH. Adesso la vago subito a far vegnir. Perché mi, sala, son servitor antigo de casa, e anca bon servitor della fameggia Bisognosi.

TON. Me cognosseu mi?

BRIGH. Ho cognossuo el so signor fradello. Un zovene veramente de garbo.

TON. Dove l’aveu cognossù?

BRIGH. A Venezia.

TON. Donca l’averè cognossù putelo56.

BRIGH. Anzi grando e grosso... Ma vien la patrona.

TON. No no, diseme. Come l’aveu cognossù a Venezia grando e grosso?

BRIGH. La me perdona, bisogna che vada. Se parleremo meggio: all’onor de servirla. (parte)