CORO

Mattina e sera

Cantemo: «e viva

La libertà».

Questa è la vera,

Questa è la nostra

Felicità.

BESSO

Cossa serve, fradei, l'arzento e l'oro,

I superbi palazzi,

Le ricche veste e le preziose tole,

Se el tesoro mazor no se possiede?

Digo la libertae dada dal cielo,

Conservada da nu con tanto zelo.

DOR.

Mi certo non invidio

La fortuna de quelle

Che de ganzo vestìe, carghe de zoggie,

Nega la volontà per complimento.

Oh quante con tormento,

Per forza e contragenio maridae,

Ghe tocca d'ingiotir,

Co se sol dir, le pillole indorae.

NISO

Caro sier Besso, ho sentio dir da tanti

Che le persone ricche

Magna boni bocconi;

Nu semo poveretti, e me rincresce

Che me tocca a magnar sempre del pesce.

BESSO

Cossa vustu de meggio?

Un bon bruetto

De bisatti marini, o femenali,

Un cievolo rostìo,

Quattro folpi da latte,

Un pospasto de cappe o masanette

Xe meggio de pastizzi e de polpette.

DOR.

E no ti xe contento

De quelle sepoiline

Che te fazzo magnar tante mattine?

BESSO

Orsù, a monte ste istorie;

Pensemo a far le nozze; avanti sera

Vôi che siè maridai.

DOR.

Caro sior pare,

Sarò tutta contenta.

NISO

Missier Besso,

Farò quel che volè, ma fin adesso

No ho fatto altro mistier che de pescar,

Né so cossa che sia sto maridar.

BESSO

No ti intendi maridar?

Se l'intende fina i pesci,

Muti e sordi in mezzo al mar.

Mamalucco senza inzegno,

Ti è più tondo della luna;

Se ti perdi sta fortuna,

Ti xe un matto da ligar. (parte)