SCENA TREDICESIMA

Strada

Pantalone e Brighella

PANT. Brighella, son desperà, Brighella, son morto. Brighella, no posso più.

BRIGH. Cos’è stà, sior Pantalon?

PANT. Non trovo in nessun logo mia fia. Da mia sorella no la xe più tornada; a casa mia no la xe vegnua; da so zermana no la xe mai stada, xe do ore che la manca co quella desgraziada de Colombina; no se sa dove che le sia andae, no se pol saver dove che le sia. Poveretto mi! Rosaura, fia mia, dove xestu, anema mia? Ah, che daria per recuperarla el mio sangue, el mio scrigno, el mio cuor.

BRIGH. Sior Pantalon, me maraveio che la daga in tutte ste smanie. Adesso in sto ponto vegno mi da casa de siora Gandolfa, e la siora Rosaura l’è in casa, e l’ho vista mi coi mi occhi.

PANT. Diseu dasseno? Oh cielo, te rengrazio! Ma la sarà vegnua a casa, dopo che mi son andà via.

BRIGH. Oh giusto! l’è stada sempre in casa.

PANT. Ma dove gierela, che non l’ho trovada in nissun logo?

BRIGH. L’era in soffitta.

PANT. Cossa favela?

BRIGH. Mi no so gnente. Le donne gh’ha delle ore, che no le vol che se sappia cossa che le fazza.

PANT. E Colombina?

BRIGH. L’era in compagnia della so patrona.

PANT. Ho chiamà, e no le m’ha sentìo?

BRIGH. Le ha sentido.

PANT. Mo perché non ale resposo?

BRIGH. Perché le no doveva poder responder.

PANT. Vu me mettè in qualche sospetto.

BRIGH. Vólela so fia?

PANT. La voggio certo.

BRIGH. La vada a casa, che la la troverà.

PANT. Ma disè...

BRIGH. Servitor umilissimo.

PANT. Vegnì qua, respondème.

BRIGH. La reverisso devotamente. (parte)

PANT. Vardè che sesti! Cussì el me impianta? Basta, se mia fia xe a casa, son contento. Pol esser che la se sia sconta per paura della pioggia; non ho gnancora podesto saver come che la sia. Quella alocca de mia sorella no xe bona da gnente. Mia fia no ghe la voi più lassar. Vago subito a veder se posso rilevar...