MIRM.

Orsù, l'aspetterò, ma voggio intanto

Provar se saverò far da regina.

Vôi sentarme un pochetto. Oh che cussin

Morbido e molesin! Fin che l'aspetto,

Poderave quassù far un sonnetto.

RUSC.

Uhi, Mirmicàina, no me cognossir?

MIRM.

Coss'è sta Mirmicàina? Che maniera

Xe questa de parlar? Oe dimme, avemio

El cebibo magnà forsi in baretta?

RUSC.

Perché star in favor de gran segnure,

Aver tanta superbia? Ti star schiava

Come le altre; mi t'aver ligada;

Mi aver cambià to nome: Mirmicàina

Adesso star, ma prima star Fiorina.

MIRM.

Quel che xe stà, xe stà: mi son regina.

RUSC.

Via, se ti star regina, e mi aver gusto:

Ma se po Albumazar

Te no volesse più,

Recòrdete, mia cara,

Che mi te voler ben, che Ruscamar

So cor per amor to sente brusar.

Quel viso tondo

Star cussì caro,

Che in tutto el mondo

Mai più veder.

Star bianca e bella,

Occhio aver moro,

Come una stella

Tanto lusér. (parte)