SCENA UNDICESIMA

Traccagnino e detto.

TRACC. Sior patron.

PANT. Cossa vustu? (copre)

TRACC. Una visita.

PANT. Che visita? adesso no recevo visite. Ho da far, no posso recever nissun.

TRACC. Ah sior patron...

PANT. Cossa gh'è?

TRACC. L'è un odor che me consola el cuor.

PANT. Va via de qua.

TRACC. Za che patisse la gola, lassè almanco che se consola el naso.

PANT. Gola de porco, va via de qua.

TRACC. Pazenzia!

PANT. Chi xe che me domanda?

TRACC. El sior don Luigi, quello che gh'ha mandà...

PANT. No lo posso recever. Dighe che no posso, che el me perdona... no lo posso recever.

TRACC. Ghe lo dirò. Sior patron...

PANT. Cossa vustu?

TRACC. Almanco una nasadina, per carità.

PANT. Presto, va da don Luigi, che nol vegnisse avanti. El sarave capace de farlo. Dighe che sarò da ello.

TRACC. Sior sì. (Ghe ne vôi magnar, se ghe fusse la forca). (da sé, parte)