TONI

Come xela sta storia?

BET.

Gnente, gnente, Tonin.

Semo anca nu con ela, la menémo al festin.

TONI

Cossa gh'intra sto sior?

GIA.

Gh'intro, perché ghe son.

ANZ.

Vardè ben che una puta sola no la par bon.

CAT.

Toni, mi no voleva.

TONI

No voggio tarocar,

No digo che a la festa no ve voggia menar.

E se una puta sola non ha d'andar cussì,

Senza che altri s'incomoda, la vôi compagnar mi. (la prende per mano, e la conduce via)

BET.

No li lassémo soli.

ANZ.

Presto, andémoghe drio.

GIA.

Donca co ste signore farò l'obligo mio. (esibisce la mano a tutte due)

BET.

Grazie. (si fa dar braccio)

ANZ.

Aceto el favor. (si fa dar braccio)

GIA.

Posso dir stali e premi;

E ariverà a la festa un copano a do remi. (partono)