SCENA SESTA

MOMOLO in puppa di un battelletto, con NANE gondoliere. Arrivano cantando il Tasso alla Veneziana, e arrivati che sono, legano il battello e scendono in terra.

MOM. Cossa distu, Nane? S'avemio devertìo pulito? Una bona marenda, quattro furlane6 de gusto, e sie putte7 al nostro comando.

NANE Ma! chi gh'ha dei bezzi, xe paron del mondo.

MOM. No stimo miga aver dei bezzi, stimo saverli spender. Chi li gh'ha e li tien sconti, fa la fonzion dell'aseno, che porta el vin e beve dell'acqua; e chi li gh'ha e li butta via malamente, se brusa senza scaldarse. El vero cortesan un ducato el se lo fa valer un zecchin. Nol se fa vardar drio, ma nol se fa minchionar; l'è generoso a tempo, economo in casa, amigo coi amici, e dretto coi dretti. El mondo, compare Nane, xe pien de furbi; el far star xe alla moda, ma con mi no i fa gnente, perché ghe ne so una carta per ogni zogo.

NANE Sior Momolo, a revederse stassera.

MOM. Sì, sì, colla bruna8 voggio che andemo a dar l'assalto a quella fortezza, che avemo scoverto stamattina. Oe, cossa distu de quei baloardi? Senti. Ho speranza che capitoleremo la resa, perché me par che la sia scarsa de provision da bocca. Lassa pur che la se defenda fin che la pol; gh'ho una bomba d'oro in scarsela, che m'impegno de farme averzer le porte, o per amor, o per forza.

NANE Digo, sior Momolo, sta patrona che sta qua a stagando9, l'aveu impiantada?

MOM. Chi? Siora Eleonora?

NANE So pur che una volta ghe volevi ben.

MOM. Mi no digo de volerghe mal; ma ti lo sa pur, che mi voggio la mia libertà. Co sta sorte de putte no bisogna trescar; perché, se se scalda i ferri, bisogna darghe una sposadina, e mi no me vôi maridar.

NANE Bravo, sior Momolo; viver de incerti fin che se pol.

MOM. Ah caro, ti me piasi, perché ti xe cortesan.

NANE Sioria vostra. (parte)