SCENA QUINDICESIMA

Truffaldino, Smeraldina, poi Momolo

SMER. Aveu mo fatto una bella cossa?

TRUFF. Siora sì, ho fatto el mio debito. In sta casa no ghe voggio nissun. Lavè i vostri drappi, tendè a vu, e no ve fe svergognar.

SMER. Sè ben deventà un omo de garbo da poco in qua.

TRUFF. I batte, voggio andar a veder chi è. (va a vedere)

SMER. Se el crede de comandar, el la falla. Co se vol comandar in casa, la se mantien. Sto tocco de baron bisogna che lo mantegna mi, e po el vol far el dottor? Sior Lucindo me piase, so che el gh'ha bona intenzion, e el ghe vegnirà a so marzo despetto.

TRUFF. (Parlando con Momolo che lo seguita) La resta servida, sior Momolo; l'è patron de vegnir a tutte le ore. Mia sorella sarà tutta contenta. Velo qua el sior Momolo, feghe ciera, che l'è un galantomo che merita.

SMER. (Con questo el se contenta, perché el gh'ha dei bezzi) (da sé).

MOM. Smeraldina, no me saludè gnanca?

SMER. Sior sì, l'ho reverida.

TRUFF. Presto una carega a sior Momolo. (porta una sedia) Sentève anca vu arente de elo. (porta un'altra sedia)

MOM. Fin adesso me fa più cortesie el fradello de la sorella. Via, siora Smeraldina, senteve qua.

SMER. (Bisogna che finza per el mio interesse). (siede) Son qua, sior Momolo, son a servirla. Ve contenteu, fradello, che staga vesina? (a Truffaldino)

TRUFF. Coi galantomeni de sta sorte me contento. La diga, sior Momolo, gh'averavela mezzo ducato da imprestarme?

MOM. E mezzo, e uno, e tutto quel che volè.

TRUFF. Ho ditto mezzo, ma se l'è intiero, la me fa più servizio.

SMER. (In sta maniera el deventa bon). (da sé)

MOM. Tolè, questo el xe un ducato. (dà un ducato a Truffaldino)

TRUFF. Grazie, farò la restituzion.

MOM. Gnente. Tegnivelo, che vel dono.

TRUFF. Questi i è omeni da farghene conto. Me dala licenzia, che vaga a far un servizio?

MOM. Andè pur dove volè.

TRUFF. Se no tornasse presto, n'importa.

MOM. Stè anca fina doman, se volè.

TRUFF. Sorella, ve lasso in compagnia de sto sior. So che sè in bone man. Sior Momolo, ghe son servitor, ghe raccomando mia sorella, che la ghe fazza compagnia fin che torno. Con altri no la lasseria; ma co sior Momolo? Se gh'avesse diese sorelle, ghe le consegneria. (parte)