SCENA QUATTORDICESIMA

Pantalone e detti.

PANT. Com'ela, sier buletto dal stilo? Seu nato per far paura? Doveressi andar in ti campi a spaventar le passere.

MART. Ve porto respetto, perché sè vecchio.

BRIGH. El mio anello, la mia roba. No se tratta cussì.

PANT. Com'ela, compare Martin?

MART. Ve torno a dir, che col vostro patron me manderà i mi quaranta ducati, ghe darò el so anello.

PANT. Un anello de sior Ottavio?

BRIGH. Sior sì, el me l'ha cavà dalle man.

PANT. E vu gh'averè tanto ardir de tegnir un anello in pegno, quando un omo della mia sorte v'ha dito che sarè pagà?

MART. Mi no so gnente. Co gh'averò i mi bezzi, darò l'anello.

PANT. Sior Ottavio xe un galantomo.

MART. I mi quaranta ducati.

PANT. Mi son un omo d'onor.

MART. Quaranta ducati.

PANT. Vintiquattro ore no xe passae.

MART. In vintiquattro ore se va a Ferrara.

PANT. Quel signor no xe capace de una mala azion.

MART. I mi quaranta ducati.

PANT. I vostri quaranta ducati i xe qua parecchiai. (tira fuori una borsa)

BRIGH. Fora l'anello, patron. (a Martino)

MART. Contème i mi quaranta ducati.

PANT. Tegnì saldo. Quaranta ducati d'arzento i fa tresento e vinti lire de sta moneda. Quattordese zecchini fa tresento e otto. Con dodese lire arente vu sè pagà. (contando)

MART. Va ben; deme i bezzi.

PANT. Fora l'anello.

MART. Tolè, sior. (lo dà a Pantalone)

PANT. Questi xe i vostri bezzi.

MART. I zecchini xeli de peso?

PANT. Vardè se i xe de peso per la marcanzia che gh'avè vendù.

MART. Ho rischià el mio sangue.

PANT. Sè un farabutto.

MART. No ve bado, perché sè vecchio. (parte)