SCENA NONA

NOTTE.

Strada.

Pantalone con lanterna, e due Uomini

PANT. Lo cognosseu sior Martin?

UOMO Lo cognosso.

PANT. De qua l'averia da passar.

UOMO A sta ora el passa ogni sera.

PANT. Ben, retireve. Stè attenti; e col capita, deghe sie bastonadele per omo, e gnente più.

UOMO Lassè far a mi sior.

PANT. No ghe dè sulla testa. No ghe fe troppo mal. Me basta che l'impara a parlar ben dei galantomeni della mia sorte. Vu altri stè là; mi stago qua; e se ghe sarà bisogno de gnente, fideve de mi. Savè chi son. No ve lasserò in te le péttole. (chiude la lanterna)

UOMO Me despiase de no poderghe dar sulla testa. (partono)

PANT. De costori me posso fidar. Per mi i anderave in tel fogo, perché po anca mi, in ti so bisogni, ghe fazzo del ben se occorre, so defenderli in t'una occasion; e per i mi amici, e per i mi dependenti, ghe son colle man, colla ose, colla scarsella e colla vita stessa se occorre.