SCENA DICIOTTESIMA

Altra camera con porta in prospetto, lume sul tavolino.

Brighella passeggiando.

BRIGH. Me pareria che fosse ora d’andar a letto. Tolì, a st’ora el padron scrive, e mi stago qua a gòder el fresco. Ho un sonno che casco, ma se m’addormento, povero mi. Se el me chiama, e che no sia pronto a responder, el me magna vivo. Oh, ecco qua mia muier! Cossa diavolo fala in quella camera? Ghe zogo che la vien a gridar. Sempre la brontola de qualcossa. Oh, la staria pur ben a servir la siora Beatrice! Ma mi son troppo bon, son troppo minchion. Bisogneria qualche volta che imparasse dal padron a tegnir bassa la muier. No digo strapazzarla come el fa lu, ma mortificarla; e mi ghe n’averia ben rason. La padrona l’è un agnellin, e Corallina l’è... Eccola qua, se la me sentisse, povero mi! Ma non l’anderà sempre cussì; un dì o l’altro me metterò i mustacchi; imparerò dal padron.