ATTO SECONDO

SCENA PRIMA

Sala che corrisponde a diversi appartamenti.

Brighella solo.

BRIGH. Oh! cossa me despiase aver desgustà Corallina! È tanti anni che semo insieme, ho sempre avù per ella dell'inclinazion, e adess per una freddura de niente semo in rotta. Ma! avemo crià dell'altre volte, e l'avemo giustada; l'aggiusteremo anca adesso. L'averia da passar de qua. A st'ora brusada, che tutti dorme, se la capita, da galantomo vôi far un sforzo e giustarla, se credesse de remetterghe tre o quattro mesi de salario. La sol andar a sta ora in te la so camera: aspetterò che la passa. Zitto, i averze la porta della siora contessa, la doverave esser ella. Da galantuomo che l'è ella.