SCENA NONA

Pantalone e dette.

PANT. (Di dentro) Pute, se pol vegnir?

BETT. La vegna, la vegna, sior Pantalon.

PANT. La nostra casa xe deventada una galarìa. Sempre antigaggie.

PANT. Cossa feu, fie mie, steu ben?

BETT. Mi stago ben, e ela?

PANT. Cussì da vecchio.

CAT. Caro sior Pantalon, nol diga sta bruta parola. Lu vecchio? S’el par un omo de quarant’ani! In verità ch’el fa vogia, el consola el cuor. Giusto adesso disevimo ben de elo. Certo no gh’ho lengua bastante de lodarme de la so carità. Se nol fusse elo, poverete nu. Mio mario no vadagna. I vadagni de le done se sa cossa che i xe. No me vergogno a dirlo, ancuo no savemo come far a disnar. El ciel l’ha mandà. Sìelo benedeto! Me dónelo gnente?

BETT. (Oh che gaìna32! Oh che finta!) (da sé)

PANT. Cara fia, dove che posso, comandeme; savè che lo fazzo de bon cuor; tiolè sto mezzo ducato, andeve a comprar qualcossa.

CAT. El cielo ghe renda merito. La resta servida, la se comoda. Betina gh’ha da parlar. Vago a comprar una polastra. Bondì a vussustrissima. (Per mezzo ducato se pol far manco che minchionar un vecchio?) (da sé, parte)