SCENA NONA

Pantalone, poi Tita barcaruolo.

PANT. Ti scampi? Te ariverò, desgraziao. (volendo inseguir Lelio)

TIT. Saldi, sior Pantalon, con chi la gh’ala? (lo ferma)

PANT. Lassème andar; lassè che lo mazza colù.

TIT. Cossa gh’alo fato?

PANT. Un affronto.

TIT. Mo sala chi xe quelo?

PANT. Mi no. Chi xelo?

TIT. Quelo xe sior Lelio, so fio.

PANT. Come? Mio fio? Quelo? Eh via, no pol esser.

TIT. Ghe digo che el xe elo senz’altro.

PANT. Ma quando xelo vegnuo? Come? No so in che mondo me sia.

TIT. El xe arivà sta matina co la coriera de Fiorenza. L’è montà in gondola a Povegia, e l’ha vogà a mezzo fin a Venezia.

PANT. E nol vien da so pare?

TIT. Poverazzo! El se voleva un poco devertir.

PANT. Devertirse? Far el sicario? Bastonar so pare? Ah furbazzo! Ah infame! Ah desgrazià! Poveri i mi bezzi mal spesi! Sto bel mistier l’ha imparà a Livorno? L’anderà in galìa, l’anderà su la forca; e mi, povero pare, averò da suspirar. Andè là, trovelo, menèmelo a casa. Diseghe che  no son in còlera. No lo lassè andar via. Caro amigo, no me abandonè. Presto, corè. Dove saralo andà? Oh che fio! Oh che gran fio! (parte)

TIT. Pare e fio i me par do mati. Mi no ghe ne vogio saver. Dise el proverbio: chi gh’ha la rogna, se la grata57. (parte)