SCENA SETTIMA

Pantalone e Arlecchino

PANT. Tolè, sior, respondèghe se gh'avè coraggio.

ARL. E cussì, tornando sul nostro proposito, quando èla de partenza, sior Pantalon?

PANT. Ma vu sè qua sul medesimo ton.

ARL. L'è che vorria saverlo, per esser pronto a servirlo, se el gh'ha bisogno de qualche cossa.

PANT. Ve ringrazio, caro; co averò bisogno, ve pregherò.

ARL. A proposito, ogni do zorni parte la diligenza; vorla che vada a véder se ghe xe tre boni loghi per éla?

PANT. (Mo el xe un gran tormento costù!)

ARL. Se no la vol andar colla diligenza, l'anderà col cocchio.

PANT. (Col diavolo che te porta).

ARL. Sì, sì, col cocchio se va più comodi, e se spende manco. Vado subito a servirla. Vado a fermar i posti nel cocchio.

PANT. Mo no ve digo, no v'incomodè.

ARL. Sì assolutamente. Voggio aver l'onor de servirla. Vado e torno subito per servirla. (parte)