SCENA NONA

Arlecchino solo.

ARL. Andemo donca, presto, subito. Fenimo de far el baul. Andemo a tor la mia roba in te la mia camera, e che se fenissa el baul, e che presto se vaga via... Ma prima me vorave almanco chiarir... Vorria saver chi ha tolto el mio ritratto che giera su quel taolin... Carlotto m'ha zurà, m'ha protestà che nol l'ha visto, che nol l'ha tolto. E po, cossa vol far Carlotto del mio ritratto? E Camilla? Camilla l'ha refudà. Ma cossa ala refudà? El mio o quello del mio patron? L'ala visto, o no l'ala visto el ritratto che ghe voleva dar? Se no la l'ha visto, l'ha inteso de refudar el mio, e no gh'è da sperar gnente per mi; se la l'ha visto, l'averà visto che nol giera el mio, e no disendome gnente, la s'ha burlà anca ela de mi. Povero Arlecchin! Poveri ritratti! Quello del patron calpestà. E el mio?... e el mio? el diavolo l'ha portà via. (parte)