Scena Quarta. Paron Vicenzo, e detti

VIC. Olà olà, zitto, donne. Cossa diavolo gh'avéu?

LUC. Oe, vegni qua, paron Vicènzo.

ORS. Oe, senti, paron Vicenzo Lasagna.

VIC. Quietève, che xé arivà in sto ponto la tartana de paron Toni.

PAS. (a Lucietta) Oe, zitto, che xé arivà mio marìo.

LUC. (a Pasqua) Uh, ghe sarà Titta-Nane!

LIB. Oe, putte, no fé che vostro cugnà sappia gnènte.

ORS. Zitto, zitto, che gnanca Beppo no sappia.

TOF. Lucietta, so qua mì, no ve sté a stremire.

LUC. (a Toffolo) Va via.

PAS. (a Toffolo) Via!

TOF. A mi? Sangue d'un bisatto!

PAS Va a ziogare al trottolo.

LUC. Va a ziogare a chiba.

TOF. A mi, mare de diana! Anderò mo giusto, mo, da Checchina. (s'accosta a Checca)

LTB. Via, spórco!

ORS. Càvete!

CHE. Va in malora!

TOF. (con isdegno) A mi, spórco? A mi, va in malora?

VIC. Va in bùrchio!

TOF (con caldo) Olà, olà, paron Vicenzo!

VIC. (gli dà uno scappellotto) Va a tirare l'alzana.

TOF. Gh'avé rason, che no vòggio precipitare. (parte)

PAS. (a Vicenzo) Dove xéli co la tartana?

VIC. In rio xé sècco, no i ghe può vegnire. I xé ligài a Vigo. Se volé gnènte, vago a vèdere, se i gh'a del pèsse; e se i ghe n'ha, ghe ne vói comprare per mandarlo a vèndere a Pontelongo.

LUC. (a Vicenzo) Oe, no ghe disé gnente.

LIB. Oe, paron Vicenzo, no ghe stèssi miga a contare.

VIC. Che cade!

ORS. No ghe stèssi a dire...

VIC. Mo no sté a bacilare.

LIB. Via, no femo che i nostri òmeni n'abbia da trovare in baruffa.

PAS. Oh! mì presto la me monta, e presto la me passe.

LUC. Checca, xèstu in còlera?

CHE. No ti sa far altro, che far despetti.

ORS. A monte, a monte. Sèmio amighe?

LUC. No voléu che lo sièmo?

ORS. Dàme un baso, Lucietta.

LUC. Tiò, vissere. (si baciano).

ORS. Anca ti, Checca.

CHE. (piano) (No gh'ho bon stómego.)

LUC. Via, matta.

CHE. Via, che ti xé doppia co fa le céole.

LUC. Mì? Oh! ti me cognossi puoco. Vié qua, dàme un baso.

CHE. Tiò. Varda ben, no me minchionare.

PAS. Tiò el to balon, e andèmo in cà, che po anderemo in tartana. (piglia lo scagno col cuscino, e parte)

LIB. Putte, andemo anca nu, che li anderemo a incontrare. (parte col suo scagno)

ORS. No vedo l'ora de vèderlo el mio caro Beppo. (parte col suo scagno)

LUC. Bondí, Checca. (prende il suo scagno)

CHE. Bondí. Vòggieme ben. (prende il suo scagno, e parte).

LUC. No t'indubitare. (parte)