Scena Sesta. Titta-Nane, e detti

PAS. Oh! Titta-Nane, còssa féu qua?

TIT. Fazzo quelo che vòggio, fazzo.

PAS. (da sé) (Oh! no la ghe xé gnanca passà).

LUC. (a Titta) No gh'avé paura dei zaffi?

TIT. (a Lucietta con sdegno) No gh'ho paura de gnente. (a paron Vicenzo) So stào dal Cogitore; el m'ha mandào a chiamare; e el m'ha dito, che camine quanto che vòggio, e che no staghe più a bacilare.

ORS. (a Lucietta) Parlé mo adesso se gh'avé fià da parlare. No ve l'òggio dito, che gh'avemo per nù el Cogitore?