SCENA DECIMA

Rosina sola.

ROS. Traccagnin xe un poco alocchetto; ma ghe vol pazenzia. In tel caso che son, gh'ho bisogno de qualchedun che fazza per mi, e se nol fusse un alocco, nol staria saldo alle figure che ghe fazzo far. Me preme de sentir qualche novità de sto sior Leandro. La speranza che gh'ho sora de elo, me fa sopportar i torti che me fa sior Ridolfo, e bisogna che procura, co dise el proverbio, che tegna el cesto su do scagni. E se darò el preterito in terra? Ghe vorrà pazenzia. Son zovene, qualchedun me farà levar su. No bisogna perderse de coraggio. Son in mar, navego per tutt'i venti. Chiaperò porto dove che poderò; e se la fortuna me xe contraria, co no me nego, me basta. Dirò ca dise quello:

«Quando s'ha principià ghe vol costanza,

E fin che ghe xe fià, ghe xe speranza.»