SCENA SECONDA

Lucietta e detti.

LUC. Siora patrona.

CEC. Cossa gh'è?

LUC. Una mascara.

CEC. Una mascara! Omo, o donna?

LUC. Omo, me par. Sala chi credo ch'el sia?

CEC. Chi?

LUC. Sior Zanetto.

CEC. Oh magari! Vardè, e se el xe elo, fe ch'el vegna avanti.

LUC. E se nol xe elo?

CEC. Sappième dir chi xe.

LUC. Siora sì. (parte)

CEC. El cognosseu sior Zanetto Bigolini? (a Lissandro)

LISS. Mi no.

CEC. Fermeve qua, se no gh'avè da far, che se el xe elo conosserè un capo d'opera.

LISS. In che genere?

CEC. In genere de cargadura, de scempiagine, de tutto quel che volè.

LISS. Cospetto! me lo goderò volentiera. A ste cosse mi ghe vago de vita11.

CEC. Oh siestu malignazo12! el xe elo, el xe elo. (guardando verso la scena).