SCENA DODICESIMA

Lissandro e detti, poi Riosa

LISS. Sala chi xe? (a Tonina, ridendo)

TON. Chi?

LISS. Sior Zanetto Bigolini.

TON. Mi no lo cognosso. (Gasparo freme, Bortolo e Cattina ancora)

LISS. El xe el più caro matto de sto mondo.

TON. E la donna! (a Lissandro)

LISS. (Guarda intorno) Sì ben, no gh'è né siora Cecilia né sior Raimondo, lo posso dir. El xe colla massèra de siora Cecilia.

TON. Chi èlo sto pezzo de aseno? Xelo logo questo de menar massère? (si alza)

LISS. La se ferma. Chi fa la festa, no l'ha da saver. Co ela ha imprestà el portego, no la xe più casa soa. Lucietta xe vestia coi abiti de la patrona, e la passa per so muggier. (Gasparo freme, e si alza)

TON. Coss'è ste baronade? Me maraveggio de vu, sior.

LISS. Mo la se ferma; el xe un chiassetto de carneval.

RIO. Chi gh'ha nome sior Bortolo?

BORT. Mi, fia. (alzandosi con affanno)

RIO. Che la vegna in tinello, che i la domanda. (parte)

BORT. Vegno. (Vago a sentir la mia sentenza). (parte)

CATT. (Poveretta mi! Me par che me vegna mal). (da sé, e beve qualche spirito)

TON. Cossa gh'ala? (a Cattina)

CATT. Gnente, fazzo perché no me vegna sonno.

TON. E cussì, sior, cossa me diseu de chiassetti? Coss'è sto finzerse mario e muggier? (a Lissandro)

LISS. (Guardandosi intorno) La xe una burla; giusto come quella de sior Bortolo e de siora Cecilia.

TON. Come! No i xe mario e muggier, sior Bortolo e siora Cecilia? (con maraviglia)

LISS. No la sa che i xe fradello e sorella?

TON. Mi! No v'arecordè cossa che i m'ha ditto in portego, co i xe vegnui? (con caldo, fremendo)

LISS. No gh'ho miga badà, la veda.

GASP. (Ride, e passeggia)

CATT. (Oh poveretti nu, in che intrigo che semo!) (da sé)

TON. Siora mascara, cossa diseu? (a Gasparo, fremendo)

LISS. Xelo el patron della festa? (a Tonina)

TON. Sior sì, sior sì; el xe el patron. (a Lissandro)

LISS. Signor, no la se metta in sospetto de gnente, perché i xe tutti galantomeni, persone oneste; la xe una burla, e no gh'è gnente de mal. (a Gasparo, ridendo)

GASP. (Fa cenno che domandi permissione a Tonina)

LISS. Siora Tonina, se conténtela che le vegna ste mascare? (a Tonina)

TON. Dove xele? (a Lissandro)

LISS. In portego.

TON. Chi le ha fatte intrar?

LISS. Gh'ho averto mi, veramente.

TON. Chi va dà sti ordini, sior?